Avokati i njohur Arianit Koci ka njoftuar përmes një postimi në rrjetet sociale se ka aplikuar në Librin e Rekordeve Guinness, për shkak të dështimeve të njëpasnjëshme në konstituimin e Kuvendit të Republikës së Kosovës.
Sipas Kocit, ky aplikim është një akt simbolik dhe formë proteste qytetare për bllokimin institucional që po ndodh në vend.
“Aplikova në Librin e Rekordeve Guinness. Si qytetar i Kosovës – e paraqita rastin absurd që po ndodh në vendin tim: 48 herë rresht ka dështuar konstituimi i Kuvendit të Republikës së Kosovës. Po, dyzet e tetë tentime – dhe ende pa Kuvend funksional. Turp, turp, turp!”, ka shkruar Koci.
Ai e cilëson këtë situatë si të pashembullt në nivel botëror, madje edhe në shtetet me kriza të thella institucionale apo me përçarje etnike dhe politike.
“Sipas meje, kjo nuk ka ndodhur askund në botë – as në vendet me krizë të thellë institucionale. Madje, as në shtetet me përçarje etnike, sektare apo politike. Vetëm te ne – në një shtet që vetëquhet demokratik.”
Koci paralajmëroi se të hënën do të vazhdojë protestën e tij para Kuvendit, duke shtuar se ajo do të jetë “interesante”, si pjesë e reagimit të tij ndaj gjendjes së krijuar në institucione.
“Ky veprim është në vazhdën e protestës sime qytetare, që kam nisur para Kuvendit. Bllokimi i institucioneve tani është çështje e rendit demokratik, e të drejtave të qytetarëve dhe e funksionimit të shtetit. Nëse Guinness e pranon, të paktën ta dimë që jemi ‘të parët në botë’ për diçka – për një rekord turpi!” – ka përfunduar ai.
