Në ndeshjen e tensionuar në “San Siro”, aty ku AC Milan barazoi 1:1 ndaj Comos, protagonisti absolut te kuqezinjtë ishte Ardon Jashari.
Mesfushori shkëlqeu në çdo aspekt të lojës dhe u shpërblye me çmimin MVP nga tifozët.
Momenti vendimtar erdhi në minutën e 64-t, kur Jashari dhuroi një asist të saktë dhe të matur për Rafael Leão, i cili realizoi golin e barazimit. Ishte një pasim mjeshtëror për nga koha dhe precizioni, që dëshmoi vizionin dhe aftësinë e tij për të ndikuar në momente kyçe të takimit.
“Gjatë gjithë ndeshjes, Jashari ishte prezent si në fazën sulmuese ashtu edhe në atë mbrojtëse. Ai ruajti qetësinë në ndërtimin e aksioneve, diktoi ritmin e lojës dhe dha energji të vazhdueshme në mesfushë. Statistikat e tij flasin qartë: një asist, 60 pasime të sakta dhe dy duele të fituara në mbrojtje. Aftësia për të mbajtur topin dhe për të organizuar lojën ishin thelbësore për Milanin”, ka shkruar faqja zyrtare e Milanit, duke e zgjedhur atë MVP-, apo lojtarin e ndeshjes.
Paraqitja e tij nuk kaloi pa u vënë re nga tifozët. Me 56.6% të votave në aplikacionin zyrtar të klubit, Jashari la pas në garën për MVP emra si Davide Bartesaghi dhe Fikayo Tomori, si dhe autorin e golit, Leão.
Kjo performancë konfirmon rolin gjithnjë e më të rëndësishëm të Jasharit në skuadër dhe jep arsye për optimizëm për ndeshjet e ardhshme.
