Ardon Jashari vazhdon të fitojë besimin te AC Milan. Në fitoren minimale 1:0 ndaj Lecce-s, mesfushori shqiptar i Zvicrës zhvilloi një paraqitje shumë të mirë, duke qëndruar në fushë për 87 minuta – hera më e gjatë që nga transferimi i tij në Serie A gjatë verës.
23-vjeçari u aktivizua si titullar nga trajneri Massimiliano Allegri, i cili pas ndeshjes nuk i kurseu fjalët e mira për ish-lojtarin e Luzernit. “Ai zhvilloi një ndeshje të shkëlqyer”, u shpreh Allegri, duke veçuar veçanërisht kontrollin e topit dhe intensitetin në vrapime të Jasharit.
Pas takimit, Jashari u shpreh i kënaqur për besimin e marrë nga trajneri, por theksoi se rezultati i skuadrës ishte më i rëndësishmi. “Jam i lumtur që isha në formacionin startues, por mbi të gjitha ka rëndësi që ekipi mori tre pikët. Trajneri kërkoi që të luaja si mesfushor mbrojtës dhe unë u përpoqa ta zbatoja këtë rol sa më mirë”, deklaroi ai për DAZN.
Një moment i veçantë për Jasharin ishte bashkëpunimi në fushë me legjendën kroate Luka Modriq. Mesfushori i ri nuk e fshehu admirimin për 40-vjeçarin: “Të luash me Modriqin është një dhuratë. Ai është një person i jashtëzakonshëm jashtë fushës dhe një futbollist i pabesueshëm. Po e shijoj çdo moment dhe shpresoj të kem edhe shumë minuta të tjera përkrah tij”.
Pas një periudhe të vështirë për shkak të një frakture në fibulë që e mbajti gjatë jashtë fushës në pjesën e parë të sezonit, Jashari duket se po rikthehet gradualisht në formën më të mirë, duke u shndërruar në një alternativë gjithnjë e më të rëndësishme për mesfushën e Milanit.
