Trajneri i Brazilit, Carlo Ancelotti, ka sqaruar arsyet e mungesës së Neymar në listën e skuadrës për ndeshjet miqësore ndaj Francës dhe Kroacisë, duke theksuar se vendimi lidhet vetëm me gjendjen fizike të lojtarit.
Sipas Ancelottit, sulmuesi i Santos FC nuk është aktualisht në formën e tij optimale, pasi këtë vit ka zhvilluar vetëm disa ndeshje pas rikuperimit nga një operacion në gju, ndërsa së fundmi ka munguar edhe për shkak të një dëmtimi muskulor të shkaktuar nga lodhja, raporton “Marcs”.
Tekniku italian theksoi se për momentin Brazili ka nevojë për lojtarë që janë plotësisht të gatshëm fizikisht, duke shtuar se vendimi nuk ka të bëjë me cilësinë e Neymarit, por vetëm me gjendjen e tij aktuale. Ai la të hapur mundësinë që ylli brazilian të jetë pjesë e skuadrës në të ardhmen, nëse arrin formën e duhur.
“Është një vlerësim fizik, jo teknik ,” vazhdoi të sqaronte Carletto. ” Neymar e trajton topin shumë mirë. Për stafin e trajnerëve, dhe për mua, ai ende nuk e ka arritur potencialin e tij të plotë. Ai duhet të punojë për ta arritur atë. Ky është mendimi im dhe i të gjithë stafit të trajnerëve, të cilët po e ndjekin dhe do të vazhdojnë të ndjekin ndeshjet e tij në muajt në vijim”, theksoi Ancelotti.
Ancelotti u shpreh se Neymar vazhdon të mbetet një lojtar shumë i rëndësishëm dhe se do të ndiqet nga afër në muajt në vijim, ndërsa pjesëmarrja e tij në FIFA World Cup 2026 do të varet nga rikuperimi i plotë dhe performancat e tij në vazhdim.
