Analisti politik, Ben Andoni, ka komentuar protestën e zhvilluar në Tiranë, duke thënë se ndonëse kishte ngazëllim tek njerëzit, mungoi serioziteti që karakterizon zakonisht një miting.
“Sikur ishte më shumë një piknik sesa një miting”, tha Andoni, duke shtuar se shumë qytetarë të Tiranës treguan indiferencë ndaj protestës.
Sipas tij, shqiptarët në raste të tilla shpesh “i kap patetizmi më shumë sesa ideja”.
“Më pëlqeu fillimi i organizimit, që kishte një vendosje në formacion ushtarak, por pastaj duhej të kishte më shumë racionalitet, pa këtë diskursin patetik që e kemi si një lloj mallkimi”, tha Andoni për Tëvë1 nga Tirana.
Megjithatë, ai vlerësoi protestën si një nismë që “shërben për ta ngritur moralin e shqiptarëve”.
Në fund, analisti shprehu shpresën që “politika t’i qëndrojë larg protestës, ndonëse duket se mundohet ta trazojë në momentet më të hidhura”.
