Basketbollisti amerikan, Maliek White nuk është më pjesë e skuadrës së Bashkimit që garon në Superligën e Kosovës.
Skuadra nga Prizreni, të martën ka njoftuar se me marrëveshje të dyanshme, ka shkëputur kontratën me amerikanin White, të cilin e ka falënderuar për kontributin dhe i ka dëshiruar suksese në vazhdim të karrierës.
White ishte ndër të huajt e parë që iu bashkua ekipit nga Prizreni para fillimit të këtij sezoni dhe në 12 paraqitje në elitën e basketbollit kosovar, ai ka luajtur me një mesatare prej 9 pikëve, 3 kërcimeve dhe 3 asistimeve për ndeshje.
Pas largimit të White, Bashkimi në radhët e veta ka vetëm tre të huaj dhe renditet i dyti në tabelë me 22 pikë, një më pak se Trepça që është lidere pas 13-të xhirove të zhvilluara.
Ndeshjen e radhës në Superligë, Bashkimi e luan këtë vikend me skuadrën e Pejës, e cila zhvillohet në palestrën “Sezai Surroi” në Prizren.
