Aventura e basketbollistit amerikan, Khalil Dukes doli të jetë shumë e shkurtër te skuadra e Sigal Prishtinës.
Ekipi i Superligës së Kosovës në basketboll, të hënën ka njoftuar se Dukes nuk është më pjesë e klubit.
Në njoftimin e klubit, thuhet se me marrëveshje të përbashkët, palët e kanë ndërprerë bashkëpunimin.
“Falënderojmë Khalil Dukes për kontributin dhe profesionalizimin e treguar gjatë angazhimit të tij me fanellën bardhekaltër dhe i urojmë suksese në vazhdim të karrierës”, shkruan Sigal Prishtina në njoftim.
Dukes në fillim të muajit janar iu bashkua Prishtinës dhe pritjet ishin të mëdha nga fundori me përvojë, por amerikani regjistroi vetëm 6 paraqitje në elitën e basketbollit kosovar dhe një në ligën ENBL.
Aktualisht, Sigal Prishtina renditet në pozitën e gjashtë në tabelë me 27 pikë të mbledhura pas 19-të xhirove të zhvilluara deri më tani.
