Ambasadorja Linda Thomas-Greenfield, përfaqësuese e SHBA-së në Kombet e Bashkuara, ka takuar në Nju Jork zëvendëskryeministren dhe ministren e Punëve të Jashtme të Kosovës, Donika Gërvalla-Schwarz.
Në njoftimin e lëshuar nga zëdhënësi Nate Evans, thuhet që Thomas-Greenfield ka uruar Gërvallën për marrëveshjen e fundit me Serbinë, të cilën e ka quajtur historike dhe ligjërisht të obligueshme, e po ashtu ka kërkuar zbatimin e saj të shpejtë.
“Ambasadorja Thomas-Greenfield përsëriti se Shtetet e Bashkuara do të mbeten të angazhuara në mënyrë aktive për të mbështetur Kosovën dhe Serbinë në zbatimin e angazhimeve të tyre në ndjekje të një marrëdhënieje të parashikueshme dhe paqësore”, thuhet në njoftim, transmeton teve1.info.
