Ambasada e Francës në Kosovë ka mirëpritur marrëveshjen e arritur nga kryenegocitorët e Kosovës dhe Serbisë më 4 prill në Bruksel me synimin e nënshkrimit të ardhshëm të deklaratës së përbashkët për personat e pagjetur.
Ambasada franceze ka thënë se ky është një hap konkret përpara, i cili u mundëson familjeve të viktimave të shpresojnë, të dinë se çfarë ka ndodhur me të dashurit e tyre, raporton teve1.info
Sipas ambasadës, më në fund po mbyllet periudha e zisë që ka zgjatur më shumë se tridhjetë vjet.
“Në kuadër të dialogut ndërmjet Prishtinës dhe Beogradit dhe të ndihmuar nga Bashkimi evropian, ky është një hap konkret përpara i cili u mundëson familjeve të viktimave të shpresojnë të dinë se çfarë ka ndodhur me të dashurit e tyre dhe më në fund të mund të mbyllin periudhën e zisë që ndonjëherë ka zgjatur më shumë se tridhjetë vjet”, thuhet në njoftimin e Ambasadës në Facebook.
Në njoftim është bërë e ditur se Franca mbështet Komitetin Ndërkombëtar të Kryqit të Kuq (KNKK), që punon me partnerët e tij kombëtar për të gjetur, identifikuar dhe kthyer këta njerëz në familjarët e tyre.
“Edhe këtë vit, një kontribut prej 100,000 euro do t’i dhurohet KNKK-së për t’i mundësuar atij të vazhdojë të kryejë misionin e saj humanitar. Kjo është thelbësore për pajtimin dhe normalizimin e marrëdhënieve ndërmjet Kosovës dhe Serbisë”, thuhet tutje në njoftim. /teve1.info/
