E propozuara e Lëvizjes Vetëvendosje për kryetare të Kuvendit, Albulena Haxhiu, në një konferencë për media ka theksuar se nga dita e parë e seancës konstituive, Vetëvendosje ka treguar vullnetin dhe ka përmbushur të gjitha detyrimet për konstituimin e Kuvendit të Kosovës.
Sipas saj, që nga 15 prilli kur presidentja Vjosa Osmani ftoi për seancën konstituive, Vetëvendosje më 19 prill bëri propozimin për kryetarin e Kuvendit, një e drejtë që u konfirmua edhe nga aktgjykimet e Gjykatës Kushtetuese.
“Gjatë kësaj kohe kemi dëgjuar arsyet e opozitës për mosvotim, ku u tha se unë jam përçarëse dhe konfliktuoze,” tha Haxhiu, duke iu referuar raporteve në media.
Ajo theksoi se pozita e kryetares së Kuvendit nuk është thjesht një detyrë institucionale, por një besim që kërkon pjekuri dhe gatishmëri për t’i shërbyer të gjithë deputetëve pa dallim.
“Unë kam qenë deputete e opozitës për 10 vite dhe ministre e Drejtësisë për gati 5 vite. Gjatë këtij rrugëtimi, pozicioni im nuk ka qenë unifikues sepse të jesh në opozitë kërkon ballafaqim. Por të jesh kryekuvendare është ndryshe – është funksion mbi partitë,” shtoi ajo.
Haxhiu i bëri thirrje opozitës të reflektojë pas aktgjykimit të Gjykatës Kushtetuese, duke kujtuar se votimi është i fshehtë dhe nëse nuk arrin të marrë 61 vota, ajo do të tërhiqet nga kandidatura.
“Me rastin e votimit të fshehtë, nëse unë si kandidate nuk marr 61 vota, tërhiqem nga kandidatura,” përfundoi ajo.
