Me një dosje në duar, shkoi në Prokurorinë Themelore në Mitrovicë.
Ish-zëvendësministri për Komunitete dhe Kthim, Radoica Radomirovic, dorëzoi një kallëzim penal.
Subjekt i këtij kallëzimi janë keqpërdorimet që ai pretendon se janë kryer në komunën e Leposaviqit.
Radomirovic pretendon se zyrtarë komunalë bashkë me operatorë të ndryshëm ekonomik, emrat e të cilëve janë të potencuar në dosje kanë kryer vepra penale të keqpërdorimit të detyrës zyrtare, keqpërdorim të fondeve publike, keqpërdorim dhe mashtrim me prokurim publik e falsifikim të dokumenteve zyrtare.
“Jemi shumë të sigurt se ish-udhëheqësia e Leposaviçit do të përgjigjet penalisht për këtë, dhe që paratë që kanë vjedhur do t’u kthehet qytetarëve të Kosovës. Ka të bëjë me projektet që janë financuar njëkohësisht nga buxheti i Serbisë dhe buxheti i Kosovës. Dua të theksoj se kjo është vetëm njëra nga paditë, e do të vijojnë edhe disa. Por ajo që ka shumë rëndësi dhe që presim ndihmë, ky nuk mund të jetë problem vetëm i joni, i disa serbëve që jemi përcaktuar për këtë hap. Kjo është një ftesë edhe për institucionet të përfshihen në këtë pjesë të punës që përgjegjësit nga Komuna e Leposaviçit të përballen me drejtësisë”, tha Radomiroviç.
Sipas Radomiroviç, dëmet që janë shkaktuar kapin vlerë milonëshe.
“Sot do të ngre padi penale për rreth 1 milionë euro të cilat janë keqpërdorur në Komunën e Leposaviçit. Kjo ka të bëjë me vjedhje disa miliona euro dhe keqpërdorim të mjeteve vetëm në komunat që janë në veriun e Kosovës”.
Në kohën sa ishte zëvendësministër për komunitete dhe kthim, Radomiroviç publikoi dhjetëra kontrata në vlera të mëdha, për të cilat ai pretendon se pati keqpërdorime.
Madje sipas tij, shumë prej projekteve për të cilat u paguan mijëra euro nga buxheti i shtetit, nuk u realizuan fare.
Që të gjitha kontratat janë të kohës kur me komunat me shumicë serbe në Kosovë, ka udhëhequr Lista Serbe.
