Prokuroria Themelore në Prizren, ka ngritur aktakuzë ndaj të pandehurit D.D., i cili ndodhet në paraburgim që nga 18 marsi 2026, nën dyshimin se ka kryer veprën penale “Rrezikimi i trafikut publik”.
Sipas aktakuzës, ngjarja ka ndodhur më 18 mars 2026 në rrugën “Wesley Clark” në Prizren. I pandehuri dyshohet se duke drejtuar automjetin e tij, nuk e ka përshtatur shpejtësinë me kushtet dhe kufizimet e parapara në atë segment rrugor, ku kufizimi i lejuar ishte 40 kilometra në orë.
Sipas Prokurorisë, D.D. ka lëvizur me shpejtësi prej 75 km/h para shtegut të këmbësorëve, në afërsi të një rrethrrotullimi. Në aktakuzë thuhet se ai ka qenë i vetëdijshëm se shpejtësia e papërshtatshme mund të shkaktonte pasoja të rënda, por megjithatë e ka pranuar lehtazi mundësinë e shkaktimit të tyre.
Si pasojë e shpejtësisë së lartë, i pandehuri dyshohet se nuk e ka vërejtur me kohë këmbësorin I.O., i cili po kalonte në shtegun e këmbësorëve, duke shkaktuar një aksident trafiku me pasoja fatale.
Viktima ka ndërruar jetë si pasojë e lëndimeve të marra në aksident. Raporti i autopsisë ka konstatuar se vdekja ka ardhur si rezultat i lëndimeve të rënda trupore të shkaktuara nga aksidenti në trafik.
Prokurori i rastit i ka propozuar gjykatës që, pas shqyrtimit gjyqësor dhe administrimit të provave, i pandehuri të shpallet fajtor dhe të dënohet në përputhje me dispozitat ligjore në fuqi./teve1.info/
