Policia e Kosovës ka zhvilluar një aksion në Komoran, ku janë sekuestruar mbi 400 gramë substancë që dyshohet të jetë marihuanë, para të gatshme dhe pajisje të tjera.
Sipas raportit të Policisë, rasti ka ndodhur të premten kur njësia e Drejtorisë për Hetimin e Trafikimit me Narkotikë (DHTN) në Prishtinë ka ndaluar një veturë me targa vendore.
Gjatë kontrollit të dy personave që ndodheshin në veturë, policia ka gjetur një cigare të mbushur me substancë që dyshohet të jetë marihuanë, me peshë prej 0.71 gramësh. Të dy personat janë liruar.
Operacioni ka vazhduar me bastisjen e dy shtëpive të personave të tjerë të dyshuar, bazuar në urdhëresën e gjykatës.
Në shtëpinë e njërit prej tyre, policia ka gjetur dhe sekuestruar 414.5 gramë marihuanë, 15 euro, dy telefona, një kamerë për monitorimin e hyrjes së shtëpisë, një peshore të vogël, një mulli për bluarjen e substancave (grinder) dhe një kartelë memorieje.
Ndërkaq, gjatë kontrollit në shtëpinë e të dyshuarit tjetër nuk është gjetur asgjë e dyshimtë.
Në stacion policor janë shoqëruar dy të dyshuarit, si dhe një person i mitur. Me vendim të prokurorit, dy të dyshuarit janë dërguar në mbajtje, ndërsa ndaj të miturit është iniciuar rasti për veprën penale “Moslajmërim i veprave penale”.
Pas intervistimit, i mituri është liruar dhe rasti do të vazhdojë në procedurë të rregullt.
“Fsh. Komoran, Gllogoc 09.10.2026 – 20:20. Njësia e DHTN-së Prishtinë gjatë një pune operative në teren ka ndaluar një veturë me targa vendore dhe gjatë kontrollit tek dy te dyshuar meshkuj kosovarë, kanë gjetur dhe konfiskuar një cigare të mbushur me substancë që dyshohet të jetë narkotike e llojit marihuanë me peshë 0.71 gram, të dyshuarit janë liruar. Në vazhdimësi të operacionit është kryer realizimi i urdhëresës të lëshuar nga gjykata për bastisjen e dy shtëpive të dy të dyshuarve tjerë meshkuj kosovarë, gjatë kontrollit në shtëpinë e njërit prej të dyshuarve janë gjetur dhe konfiskuar: 414.5 gramë substancë narkotike e llojit marihuanë, 15 euro, dy telefona, një kamerë për monitorimin e hyrjes së shtëpisë, një peshore e vogël, një grinder dhe një kartelë memorie, ndërsa tek i dyshuari tjetër nuk është gjetur asgjë e dyshuar. Në lidhje me rastin dy të dyshuarit janë shoqëruar në stacion të policisë si dhe një i mitur. Me vendim të prokurorit dy te dyshuarit janë dërguar në mbajtje, ndërsa ndaj të miturit është iniciuar rasti “Moslajmërim i veprave penale” dhe pas intervistimit është liruar në procedurë të rregullt”, thuhet në raport./teve1/info/
