Kryetari i Bashkimit Demokratik për Integrim (BDI), Ali Ahmeti, ka shprehur mbështetje të plotë për protestën që do të zhvillohet sot në Strasburg, në mbështetje të ish-krerëve të Ushtrisë Çlirimtare të Kosovës.
Protesta do të zhvillohet para Asamblesë Parlamentare të Këshillit të Europës, aty ku Ahmeti thotë se ka filluar “padrejtësia e madhe” ndaj UÇK-së dhe popullit shqiptar.
Në një postim në Facebook, Ahmeti ka kritikuar ashpër Gjykatën Speciale, duke theksuar se ajo nuk po gjykon sipas qëllimeve për të cilat u themelua, por mbi shpifjet e Serbisë të mbështetura nga Rusia.
“Hashimi, Kadriu, Rexhepi, Jakupi dhe të tjerët janë aleatë të Shteteve të Bashkuara dhe Bashkimit Europian, dhe vendi i tyre është në Kosovë,” ka shkruar Ahmeti, duke shtuar se pafajësia e këtyre liderëve është konfirmuar nga miqtë tanë amerikanë dhe europianë në Hagë.
Ahmeti ka bërë thirrje që “padrejtësia duhet të marrë fund menjëherë,” dhe ka theksuar se populli shqiptar është në këmbë për të mbrojtur drejtësinë dhe shenjtërinë e luftës çlirimtare.
OVL-UÇK proteston sot në Strasburg për lirimin e ish-krerëve të UÇK-së
