Agjencia për Mbrojtjen e Mjedisit të Kosovës ka bërë apel për marrjen e masave të menjëhershme nga institucionet përgjegjëse për të parandaluar shpërthimin e zjarreve në deponitë urbane të mbeturinave në vend.
Sipas kësaj agjencie, me rritjen e temperaturave gjatë muajve të verës, rreziku për përhapjen e zjarreve në këto zona është rritur ndjeshëm dhe paraqet kërcënim të drejtpërdrejtë për mjedisin dhe shëndetin e qytetarëve.
“Zjarret në deponi përbëjnë rrezik serioz për shëndetin e qytetarëve dhe mjedisin, siç u dëshmua edhe nga rasti i fundit i zjarrit në deponinë e Elbasanit në Shqipëri”, thuhet në thirrjen e publikuar nga AMMK.
Agjencia kërkon nga komunat, kompanitë e pastrimit dhe autoritetet përgjegjëse që të marrin masa parandaluese, përfshirë kontrollin më të rreptë të deponive, pastrimin e mbeturinave të rrezikshme dhe gatishmërinë për intervenim të shpejtë në rast zjarri.
