Australia po zgjeron ndalimet e saj kontroversiale për rrjetet sociale për të miturit.
Sipas agjencisë rregullatore shtetërore eSafety, që nga 10 dhjetori, rregullimet do të përfshijnë edhe platformën e njohur të transmetimit Twitch. eSafety thekson se Twitch është vlerësuar si një platformë me ndërveprime sociale të rëndësishme, sepse përdoruesit komunikojnë aktivisht përmes bisedave (“chat”) gjatë transmetimeve live.
Për këtë arsye, shërbimi nuk mori statusin e përjashtimit, si disa platforma që shërbejnë ekskluzivisht për lojëra.
Twitch do të ndalojë krijimin e llogarive për personat nën moshën 16 vjeç.
Llogaritë ekzistuese të përdoruesve të mitur në Australi do të deaktivizohen deri më 9 janar 2026.
Kompanitë që nuk marrin masa efikase mund të përballen me gjoba deri në 49.5 milionë dollarë australianë.
Është interesante që platforma Pinterest nuk do të bëhet pjesë e ndalimit, sepse rregullatori vlerëson se ajo kryesisht përdoret për shikimin dhe ruajtjen e ideve vizuale, jo për ndërveprim social.
Këto masa janë pjesë e strategjisë më të gjerë kombëtare për të mbrojtur shëndetin mendor të fëmijëve dhe për të reduktuar ekspozimin e tyre ndaj përmbajtjeve të rrezikshme në internet.
Ndërkaq, Twitch planifikon të ofrojë këtë vit mjete financiare si abonimet dhe Bits për të gjithë ‘streamerët’, ka konfirmuar drejtori i kësaj platforme, Dan Clancy.
Më parë, ‘monetizimi’ i transmetimeve në Twitch kërkonte arritjen e statusit “Affiliate” në këtë platformë, por kjo do të ndryshojë.
Abonimet e përdoruesve në një kanal Twitch dhe mbështetja përmes Bits, monedhës digjitale të Twitch-it, janë dy mënyrat kryesore që një ‘streamer’ mesatar të fitojë para nga transmetimet e tij, përveç të ardhurave pasive nga reklamat ose sponsorët.
Aktualisht, çdo abonim i ri ndahet në një raport 50/50 pas përpunimit të tarifave dhe taksave, ndërsa çdo Bit i marrë gjatë një transmetimi vlen 0.01 dollarë.
