Kandidati i AAK-së për kryetar të Komunës së Vushtrrisë, Mensut Ademi, ka theksuar se arsimi është shtylla kryesore e planprogramit qeverisës të këtij subjekti politik për komunën.
Në emisionin “Ditari” në Tëvë1, Ademi ka treguar se synimi i AAK-së në arsim është ngritja e nxënësve në karrierë, duke i profilizuar ata në drejtime të ndryshme.
“Në programin tonë, shtylla e parë është arsimi dhe ngritja në karrierë. Çfarë nënkupton kjo? Plani ynë është që që nga shkolla fillore e deri në shkollën e mesme, të udhëzojmë nxënësit drejt profileve të tyre: kush është me profil universitar, kush me profil gjimnazial, kush në shkolla teknike, dhe kush në fushat e shkencave apo teknologjisë informative. Kjo ngritje në karrierë ka për qëllim kryesisht ndihmën ndaj familjeve për të profilizuar sa më mirë fëmijët e tyre,” tha Ademi.
Ndërkohë, në fushën e shëndetësisë, Ademi ka premtuar trajnim të stafit mjekësor, pajisje me laboratorë të rinj, rritje të numrit të stafit shëndetësor dhe furnizim me barna nga Bashkimi Evropian.
“Duhet t’i trajnojmë stafin për përdorimin e paisjeve. Komuna e Vushtrrisë, në bashkëpunim me qendrat dhe Ministrinë e Shëndetësisë, duhet të pajiset me laboratorë të rinj. Gjithashtu, të rritet numri i stafit shëndetësor dhe të sigurohen barna nga Bashkimi Evropian. Këto janë pikat kryesore në këtë sektor që ne synojmë t’i ofrojmë,” ka premtuar ai.
