Abdullahu i ka bërë edhe një thirrje Qeverisë, që çështjen e veteranëve ta trajtojë pa ngarkesa politike.
“Po krejt këto bashkë nuk na mohojnë të drejtën që ne të themi Qeveri je duke gabuar, thirri mendjes, merre situatën vlerësoje esëll, pa ngarkesa politike, e që ne mendojmë që ka ngarkesa politike tek kjo Qeveri dhe mënyren se si i qaset veteranëve”, ka thënë Abdullahu.
Ai tutje ka thënë se veteranëve duhet të iu qasemi në mënyrë tjetër, sepse sipas tij, ata kanë mundësuar që qytetarët e Kosovës të frymojmë lirshëm.
“Konsideroji veteranët ata që na kanë mundësuar të frymojmë lirshëm ta bëjmë këtë shtet, kështu duhet të iu qasemi atyre, gjë që Qeveria nuk po e bënë”, shtoi ai.
Abdullahu e ka komentuar ofendimin që disa veteranë ia kanë bërë deputetit të PDK-së, Abelard Tahirit në protestën e mbajtur, duke thënë se kjo tregon se PDK-ja nuk është organizatore e protestës së veteranëve.
“Ajo tregon se PDK-ja nuk është organizatore e atyre protestave, se kjo kategori e nëpërkëmbur sot nga kjo Qeveri nuk është zgjatje e PDK-së, ne e kemi ndjeshmërinë, besojmë më shumë se të tjerët për këtë kategori”, ka thënë ai.
Abdullahu tha se veteranët nuk duhet të kualifikohen partiakisht, sepse sipas tij, PDK-ja i përkrah vetëm për shkak se mendojnë që po i bëhet hile.
“Ata veteranë nuk bënë të kualifikohen partiakisht, ne kur po i përkrahim, po i përkrahim se po mendojmë që po i bëhet e me hile, duke e anashkaluar ligjin apo duke mos bërë përpjekje fer dhe ndershëm për të bërë ligj që do të ua bënte jetën jetën më të dinjitetshme”, deklaroi ai në ‘Ditari’.
Tutje Abdullahu ka thënë se Qeveria, protestuesit i sheh sikur votues të PDK-së.
“I konsiderojnë që janë votues të PDK-së… Brenda tyre gjithsesi se ka njerëz të pakënaqur që i thonë PDK-së ‘epo ku ishit ju të PDK-së që nuk na keni bërë jetën më të mirë’, kjo të flet se ata nuk janë nën ndikimin tonë partiak, kjo flet se aty ka të pakënaqur edhe me PDK-në”, përfundoi ai.
