Kryetari i Lidhjes Demokratike të Kosovës, Lumir Abdixhiku, për arrestimin e drejtorit të KEK-ut, Nagip Krasniqi, ka thënë se është përgjegjësi politike për mafinë energjetike.
Abdixhiku ka thënë se ishte interes i mafisë energjetike që Blloku A5 i KEK-ut të mos prodhonte rrymë. Sipas tij, për aq kohë sa ishte jashtë funksionit, Kosova është detyruar të importonte energji.
“ Vetëm gjatë 11 ditëve të para të prillit, Kosova kishte importuar plot 5.4 milion euro rrymë. Nuk ka një biznes tjetër, ku 5.4 milionë euro mund të gjenerohen për vetëm 11 ditë. Mjaftueshëm për të mbuluar 45 mijë pensione, apo ndërtuar 9 çerdhe për fëmijë – të djegura për vetëm 11 ditë!”, ka shkruar i pari i LDK-së në një postim në Facebook.
Abdixhiku ka thënë se si parti kanë kërkuar shkarkimin e gjithë udhëheqjes së KEK-ut, militantë partiak të vendosur nga partia në pushtet, që sipas tij pikërisht për shkak të një skandali si ky që kishte nisur nga korriku i vitit 2022.
“Ata gjetën mbrojtjen vetëm sepse ishin të partisë. Të njëjtit, pas dëmeve milionëshe ndaj vendit, ndodhen sot në pranga të Policisë”.
Ai thotë që shkarkimi i Nagip Krasniqit është i vonshëm dhe sipas tij , kjo përgjegjësi ka adresë Qeverinë e tanishme.
“Tani shkarkimi është i vonshëm. Përgjegjësia politike për vendosjen, mbrojtjen dhe lejimin e përfitimeve milionëshe të mafisë energjetike është domosdoshmëri. Kjo përgjegjësi ka adresë vet Qeverinë”, ka shkruar ai mes tjerash.
Policia e Kosovës sot ka kryer një bastisje në zyrat e KEK-ut me urdhër të Prokurorisë, me ç’rast është arrestuar drejtori i KEK-ut Nagip Krasniqi dhe është dërguar në mbajtje për 48 orë./teve1.info/.
