Lidhja Demokratike e Kosovës ka nisur zyrtarisht fushatën për zgjedhjet parlamentare të 9 shkurtit me një tubim në Pallatin e Rinisë, në Prishtinë.
Kryetari i kësaj partie dhe njëheri kandidat për kryeministër, Lumir Abdixhiku, nisi fjalimin hapës duke thënë se sot nis kapitull i ri për Kosovën.
“Ju kërkoj falje mijëra rugovistëve që mbeten jashtë sallës, si shenjë e ringritjes sonë të madhe para zgjedhjeve. Jemi mbledhur jo vetëm si pjesëtar të një lidhje politike, por si një shtëpi e bashkuar që ndërtojnë të ardhmen e një vendi që duhet të qëndrojë krenar. Shënojmë fillimin e kapitullit të ri për Kosovën. Sot shënojmë ngritjen e së djathtës. Çfarë kemi nisur sot këtu, do të mbahet mend për gjenerata të tëra. LDK-ja kur ngritet në këmbë, nuk ka asgjë që e ndal”, tha Abdixhiku.
