Njëherit, Abdixhiku ka përmendur edhe letrën e urimit të shkruar nga Presidenti i SHBA-së, Joe Biden, drejtuar Presidentit të Serbisë, Aleksandar Vuçiq, teksa i kishte kërkuar arritjen e një marrëveshje gjithëpërfshirëse me Kosovën.
“SI ARRITËN DERI KËTU? Liderët shtetërorë i detyrohen popullit të Kosovës një shpjegim se si arritën – në dy vite të tyre – deri tek ky përfundim. Sepse politika e tyre e theqafjes nuk përbën asnjë shpjegim patriotik. Më 7 shkurt të vitit 2021, Presidenti i Shteteve të Bashkuara të Amerikës Joe Biden, nëpërmjet një letre urimi, i kishte kërkuar Presidentit të Serbisë Vuçiq, arritjen e një marrëveshje gjithëpërfshirëse me Kosovën të përqendruar në njohjen e ndërsjellë. Pra njohja e ndërsjellë, respektivisht njohja e pavarësisë së Kosovës nga Serbia ishte politikë qendrore e administratës Biden. Si njëri nga Presidentët më të involvuar me çështjen e Kosovës, që nga vitet e 90-ta e këndej, Joe Biden dhe qëndrimi këmbëngulës për Kosovën, shpërfaqnin një mundësi të jashtëzakonshme për popullin e vendin tonë”, ka shkruar Abdixhiku në Facebook.
Madje sipas tij, që nga koha kur Qeveria Kurti është në pushtet, pozicioni ndërkombëtar i Kosovës është më i rënduar.
“Saktësisht dy vite me Qeverinë Kurti, dhe pozicioni ndërkombëtar i Kosovës duket qartazi i rënduar. Tani aleati ynë kryesor thekson se koha nuk është për njohje. Ky qëndrim vjen si pasojë e papërgjegjësisë populliste që për politikë turmash jo që s’arriti të përfitojë nga kjo administratë, por pariparueshëm degradojë relacionet në qëndrime që tani dhe normalizojnë mosnjohjen”, thuhet tutje në postimin e tij.
Derisa, në përmbyllje të tekstit, Abdixhiku ka shkruar se në momentin më të mirë në dekada për Kosovën, e në momentin më të rëndë për Serbinë dhe aleatin e saj Rusinë, Qeveria e Kosovës ka regresuar një fundament me partnerë strategjikë duke i dhënë një dhuratë të papritshme kundërshtarit historik të Kosovës./teve1.info/.
