Kryetari i Lidhjes Demokratike të Kosovës, Lumir Abdixhiku ka njoftuar se ka refuzuar dorëheqjen e Xhafer Gashit nga strukturat e partisë në Obiliq.
Abdixhiku ka thënë se para 4 viteve LDK në këtë komunë ishte me vetëm 10%, kurse sot është 46% dhe sipas tij kjo meritë e Gashit.
“Xhaferi është një prej njerëzve që nuk dorëzohet para vështirësive. Ai është njeri i fjalës, i punës dhe i përkushtimit të heshtur ndaj qytetarëve të tij. Në këto vite, ai i ka dhënë Obiliqit drejtim, dinjitet dhe stabilitet; në një komunë që ka parë shumë sfida. Sot, më shumë se kurrë, Lidhja Demokratike e Kosovës ka nevojë për njerëz të tillë, me karakter, me vizion dhe me besim në vlera. Prandaj, e kam rikonfirmuar Xhafer Gashin në pozitat e tij brenda LDK-së, si në Degë të Obiliqit, ashtue dhe në Kryesi e Këshill të Përgjithshëm. Sepse LDK nuk i braktis njerëzit e saj në një moment të vështirë; përkundrazi, LDK di të trajtojë edhe fitoren edhe humbjen me plot dinjitet”, ka shkruar Abdixhiku.
Xhafer Gashi mbrëmë njofto se ka dhënë dorëheqje nga të gjitha strukturat e LDK-së, pas humbjes në raundin e dytë për kryetar të Obiliqit nga Halil Thaçi i LVV-së.
