Deputetja, Hykmete Bajrami është propozuar për shefe të Grupit Parlamentar të LDK-së, ndërsa deputeti Kujtim Shala për nënkryetar të Kuvendit të Kosovës.
Lajmin e ka bërë të ditur kryetari i Lidhjes Demokratike të Kosovës, Lumir Abdixhiku nëpërmjet një postimi në Facebook.
Ai ka thënë se propozimi është mbështetur nga Grupi Parlamentar dhe nga kryesia e LDK-së.
“Sot, para strukturave vendimmarrëse të partisë, kam propozuar Akademik Kujtim Shalën për nënkryetar të Kuvendit të Republikës, si dhe zonjën Dr. Hykmete Bajramin për Shefe të Grupit Parlamentar të LDK-së. Propozimi është mbështetur nga Grupi Parlamentar dhe nga Kryesia e Lidhjes Demokratike të Kosovës; dhe të dy pozitat do të nominohen përkatësisht caktohen nga grupi ynë. Ju priftë e mbara e dalshi faqebardhë në këtë detyrë fisnike për shtëpinë tonë politike, votuesit tanë e popullin e Kosovës”, ka shkruar Abdixhiku.
Ndryshe, në legjislaturën e tetë të Kuvendit të Kosovës, shefi i Grupit Parlamentar i LDK-së ishte Arben Gashi./teve1.info/
