Kandidati për kryeministër nga Lidhja Demokratike e Kosovës, Lumir Abdixhiku, ka deklaruar se Suhareka sot kërkon shpresë dhe rreshtim të qartë pas LDK-së, duke theksuar se qytetarët janë të lodhur nga qeverisja populliste dhe propaganda politike.
Abdixhiku tha se LDK-ja është e përforcuar fuqishëm nga mërgimtarët dhe e rrënjosur thellë në vlerat e djathta kombëtare, ndërsa qytetarët besojnë në ekipin, listën dhe programin e kësaj partie, si dhe në përgjegjësinë për të ardhmen e Kosovës.
Ai prezantoi edhe zotimet kryesore të LDK-së, të cilat përfshijnë mësimin tërëditor, ndërtimin e çerdheve të reja, paketën për të porsalindurit, pensione prej 300 eurosh, paga prej 1000 eurosh për mësuesit, si dhe investime të mëdha në infrastrukturë rrugore, energjetikë, turizëm dhe bujqësi.
Abdixhiku theksoi se Suhareka përfaqësohet në listën e LDK-së nga kandidatë të dëshmuar profesionalisht në fusha të ndryshme, si ekonomia, shëndetësia dhe qeverisja lokale: Ardian Shala (26), Flamur Bytyçi (80), Dafina Kolgeci (81) dhe Feim Gashi (82).
