Kryetari i Lidhjes Demokratike të Kosovës, Lumir Abdixhiku, ka bërë thirrje që Kuvendi i Kosovës të konstituohet sa më parë, duke theksuar se nuk ekziston asnjë arsye për shtyrjen e procesit.
Para takimit me kryeministrin në detyrë, Albin Kurti, Abdixhiku deklaroi se prioritet mbetet përmbushja e obligimeve kushtetuese dhe përfundimi i procesit të konstituimit të Kuvendit.
“Do të vazhdojmë me punët tona që duhet të bëjmë që të konstituohet Kuvendi. Nuk ka asnjë arsye që të vonohet konstituimi i Kuvendit. Po më lejoni të shkoj në takim, e pas takimit do të deklarohem”, tha ai.
I pyetur nga gazetarët se çfarë nënkupton kërkesa e LDK-së, Abdixhiku u përgjigj shkurt se ajo lidhet me konstituimin e Kuvendit.
“…për konstituimin e Kuvendit”.
Kreu i LDK-së tha se seanca konstituive duhet të mbahet pa shtyrje dhe se Kuvendi duhet të përmbushë obligimet e tij institucionale, duke zgjedhur kryetarin dhe Kryesinë.
“Duhet të ketë seancë konstitutive. Duhet të ketë seancë konstitutive. Nuk ka nevojë të vonohet me konstituimin e Kuvendit. Duhet të votohet kryetari i Kuvendit dhe Kryesia e Kuvendit. LDK-ja as ka kërkuar, as kërkon që të bëhet ose të ketë vonesa të tilla”, deklaroi ai.
Abdixhiku theksoi se përgjegjësia për ecurinë e procesit i takon edhe partisë së parë, duke paralajmëruar se LDK nuk do të bëhet pjesë e asnjë taktike negociuese që do të ndikonte në vonimin e konstituimit të institucioneve.
“Por tani, kjo është përgjegjësi edhe e partisë së parë, e cila qëllon që ka më të vjetrin në seancë aty, të ulur në karrigen e kryesuesit të Kuvendit. Por në qoftë se është bërë për taktikë negociuese, le ta themi shumë qartë: LDK-ja nuk nënshtrohet e Republika nuk dorëzohet. Prandaj, as nuk nënshtrohemi, as nuk dorëzohemi”, u shpreh ai.
Në përfundim, Abdixhiku bëri të ditur se pas përfundimit të takimit me Kurtin do të dalë sërish para mediave për të bërë të ditura detajet e diskutimeve.
“Tani po shkoj në takim, e pas takimit do të përpiqemi sa më mirë të përfaqësojmë interesat e Kosovës, popullit të Kosovës dhe Lidhjes Demokratike të Kosovës. Pas takimit deklarohemi edhe para medieve në Kuvendin e Kosovës”, tha Abdixhiku.
