Aleanca për Ardhmërinë e Kosovës të mërkurën ka riafirmuar qëndrimin e saj për formimin e një qeverie nga opozita, si alternativa më e mirë për vendin.
Kështu është bërë e ditur në njoftimin për media të AAK-së pas mbledhjes së mbajtur nga kryesia e saj.
“Në këtë momentum të ri politik, pas caktimit të datës për mbledhjen konstituive të Kuvendit të Kosovës, AAK riafirmon qëndrimin e saj të palëkundur për formimin e një qeverie nga opozita, si alternativa më e mirë për vendin”, thuhet në njoftim.
Po ashtu bëhet e ditur se gjatë mbledhjes është diskutuar edhe mbi zhvillimet politike në vend dhe përgatitjet për zgjedhjet komunale të tetorit.
“Gjatë takimit, u dakordua që degët të nisin përgatitjet për identifikimin e kandidaturave për asambletë komunale dhe për kryetarë komunash. Në komunat ku Aleanca aktualisht udhëheq, kryetarët e tanishëm do të jenë pjesë e garës për një mandat të ri qeverisës”, theksohet në njoftim.
Ndryshe, presidentja e Kosovës, Vjosa Osmani, ka caktuar 15 prillin si datë për mbajtjen e seancës konstituive të përbërjes së re parlamentare të dalë nga zgjedhjet e rregullta të 9 shkurtit.
