Zarfe ka plotë.
Por thuajse në asnjërin nga ta nuk ka faturë të energjisë elektrike.
Ani pse kjo është e rregulluar me ligj.
Të pakënaqur me këtë janë qytetarët.
“Vijnë rregullisht, por vijnë në fatura të hapura. Po si Termokosi që i bjen të mbyllura në zarfe, edhe kjo për banesa që është edhe ata i bijnë të mbyllura, përndryshe tjetër kush jo. Krejt i sjellin faturat veç i fusin aty në kuti postare. Qashtu pa kurfarrë, kush do mundet me i kontrolluar me i shiku, kojshia sa ka harxhu”, thotë qytetari Hilmi Rrahmani.
Se faturat e rrymës vijnë të hapura e thotë edhe ky qytetar.
“Unë nuk merrna me to merret djali dhe reja ata i kanë përsipër mundem ndoshta me thanë që u kanë ndonjëra në zarfe, por unë pa si kam. Por edhe tash me shku aty ku i lëmë në atë kutinë janë pa zarfe”, thotë Hakif Hamiti.
E Avdullah Ibishi, ka një hall tjetër.
“Faturat e rrymës vijnë me faturë të hapur ,edhe bile vijnë unë jetoj në Bardhosh, a më vjen në adresë në Prishtinë. Prej 2002 kam qenë nëpër Gjykata, s’po ma ndryshojnë as Gjykata as KEK-u, e unë në tjetër adresë nuk kam të drejtë as me paguar rrymën”, tha ai.
Për gjithë këtë situatë, nga KESCO kanë një arsyetim.
“Konsumatorët tonë janë të shpërndarë edhe shpesh herë edhe kushtet e kanë pamundësuar ndoshta që të respektojmë qind për qind kërkesën për t’i vendosur faturat në zarfe. Gjithsesi kemi pasur problem edhe në mungesat e kutive postare por jemi angazhuar dhe po mundohemi maksimalisht që anë e kënd Kosovës ta respektojmë këtë ligj”, tha Margarita Rashiti, zëdhënëse në KESCO.
Faturat e energjisë elektrike janë nën mbikëqyrje të ligjit nga Agjencia për Informim dhe Privatësi.
Mirëpo nga kjo Agjenci thonë se nuk kanë marrë ndonjë ankesë nga qytetarët.
“Ne kemi pranuar gjithashtu informacion prej kontrolluesve prej kompanive qe veç se kanë filluar implementimin e këtij projekti. Në disa lagje vetëm kanë filluar të futën në zarfe faturat e konsumatorëve. E ne si agjencion nuk kemi pranuar ankesa nga qytetarët pasi që kemi shqiptuar gjoba”, tha Arbian Arifi nga Agjencia për Informim dhe Privatësi.
Për moszarfimin e faturave, kjo Agjenci kishte gjobitur vitin e kaluar dy kompani.
