Deputetët shqiptarë do të kenë para vetës një rezolutë kundër raportit të Dick Marty, në të cilin pretendohet se UÇK-ja ka kryer krime kundër njerëzimit.
E kjo iniciativë e ndërmarrë nga partia socialiste shqiptare, e udhëhequr nga Edi Rama, ka ngjallur reagime të shumta brenda dhe jashtë vendit.
Për deputetin e Lëvizjes Vetëvendosje, Fatmir Humolli, veprimi më i duhur është zhbërja e tërësishme e Speciales.
Ai fajëson politikanët kosovarë, për të cilët thotë se nuk po kanë guxim të marrin një veprim të tillë.
“Duhet të zhbëhet tërësisht. Kjo gjë mund të bëhet nga Kuvendi i Kosovës. Por po mungon vetëdija politike. Dikur disa njerëz mendonin që s’mund ta mposhtim Serbinë, por e mposhtëm. Sot po mendojnë që nuk mund ta zhbëjnë Specialen, por mundemi”, tha Humolli.
Profesori universitar, Milazim Krasniqi, e mirëpret iniciativën e shtetit shqiptar, por zhbërjen e Speciales e sheh si të pamundur.
Edhe avokati i licencuar nga Gjykata Speciale, Artan Çerkini, e mirëpret iniciativën e Parlamentit shqiptar.
Madje, thekson se kjo rezolutë do të arrijë efekte.
Por ndryshe po mendon avokati Tomë Gashi.
Thotë se ky veprim i Edi Ramës është luftë direkte ndaj Albin Kurtit.
“Kurgjë s’mundet me u bë me këtë rezolutë. Kjo është veç një tendencë e Ramës për me sulmu Kurtin”, tha ai.
Edhe pak muaj bëhen 2 vjet prej ditës kur janë arrestuar dhe paraburgosur disa prej figurave më të rëndësishme të Ushtrisë Çlirimtare të Kosovës, përfshirë këtu ish-kryeministrin dhe ish-presidentin e Kosovës, Hashim Thaçin.
Ndër liderët e parë që i pati vizituar ata në Hagë, ishte pikërisht kryeministri shqiptar, Edi Rama.
Madje në shumë ngjarje ndërkombëtare, Rama, ka folur hapur kundër kësaj gjykate dhe padrejtësive që sipas tij bëhen nga ajo.
Raporti i gazetarit Arton Rama.
