Qeveria e Kosovës ka marrë vendim më 22 maj që pensionistët, fëmijët, studentët aktivë dhe punëtorët e sektorit privat të përfitojnë nga një mbështetje financiare prej 100 eurosh. Ndërkaq, është bërë e ditur se pensionistët dhe fëmijët këtë mbështetje do ta marrin në prag të festës së Kurban Bajramit.
Vendimi u bë publik nga kryeministri në detyrë, Albin Kurti, gjatë mbledhjes së Qeverisë, në kuadër të pakos “Përballje me Inflacionin 2.0”.
Pas përfundimit të mbledhjes së Qeverisë, ministri në detyrë i Financave, Hekuran Murati, ka sqaruar kriteret e përfitimit, duke bërë të ditur se studentët që njëkohësisht janë të punësuar nuk do të mund të përfitojnë dy herë nga kjo masë.
Sipas Muratit, në rastet kur një student është edhe i punësuar në sektorin privat, ai do të marrë vetëm një pagesë prej 100 eurosh dhe jo 200 euro.
Po ashtu, ministri Murati ka njoftuar sot se është hapur aplikimi për studentët.
Qeveria ka bërë të ditur se pensionistët dhe fëmijët nuk do të kenë nevojë të aplikojnë, pasi institucionet tashmë posedojnë listat e përfituesve.
