Ka më shumë se tetë vite që është nisur.
E në shkollën fillore “Halil Alidema” ende janë duke vijuar punimet për përfundimin e saj.
Mirëpo të mërkurën ministrja e Arsimit, Arbërie Nagavci paralajmëroi se do ta pres shiritin për përurimin e kësaj shkolle.
Por me kërkesë të kryetarit të kësaj komune, përurimi i saj u shtye për shkak se u tha që nuk është e gatshme për nxënësit.
E i pari i Komunës, Sokol Haliti tregon për televizionin se nuk lejoi “prerjen e shiritit” për shkak se do ta shkelte ligjin.
“Ne gjatë natës së tempreraturës tek shkolla e shohim se 7 deri në 10 gradë nuk ka temperaturë më të lartë shkolla momentalisht sa i përket nxemjes, ne nuk mundemi me 7 gradë me i shti nxënësit dhe fëmijër në shkollë fillore filizat e rinjë. Shkolla e Pozheranit ende ka punë, duhet me punu tek kanalizimi, ende tek ndërtimi i ulët, ende duhet me punu në suvatim, ende duhet me u punu shkallët ndihmëse, ende duhet me u punu në sallë sportive që edhe ajo është me paramasë, parallogari” , tha Haliti.
Sipas tij, ngutia për përurimin e kësaj shkolle dhe një çerdheje në një fshat të kësaj komune, ka të bëjë me fushatën zgjedhore.
“Është stërgjatë kjo shkollë, që katër vite nuk është punu, tash gjatë zgjedhjeve janë çu po dojnë me përuru ende pa u përfundu. Unë nuk kam leju, tek e fundit e kam dhënë mendimin tim institucional dhe ligjor që ministrja e ka pranu, dhe rregullariteti ligjor mbi të gjitha është edhe për kryetarin edhe për ministren. Zv.ministri duhet me pranu edhe vendimin e ministres e cila ka deklaruar se pa u përfunduar punimet nuk ka përurim, prandaj iu kanë nevojit me i mbulu deficit edhe ashtu nuk e ka mbrojtë interesin e komunës sonë dhe regjional” , shprehet Haliti.
Tëvë1 ka kërkuar të marrë një qëndrim nga zv.ministri i Arsimit, Arsim Ademi, i cili fillimisht ka pranuar të flasë.
Mirëpo më vonë gjatë ditës, nuk ka qenë i qasshëm, derisa në një reagim të mërkurën në Facebook, i ka quajtur të pavërteta deklaratat e Halitit.
Aktualisht, nxënësit po vijojnë mësimin në objektin e shkollës së mesme me nga 20 minuta orën mësimore.
