69 mantelbardhë që nga janari e deri më tani kanë tërhequr certifikatën mbi të kaluarën etike.
Kjo certifikatë shërben si dokumentacion për të punuar jashtë vendit, si dhe për nevoja të tjera profesionale brenda Kosovës.
Nga Oda e Mjekëve të Kosovës thonë se arsyet e largimit nga vendi janë të shumta.
“Gjatë këtij viti, deri më tani, 69 mjekë kanë tërhequr të njëjtën certifikatë. Sipas një studimi të realizuar nga Oda e Mjekëve të Kosovës, arsyet kryesore të largimit të mjekëve lidhen me mungesën e mundësive për punësim, pakënaqësinë me kushtet e punës, pagat, si dhe mungesën e mundësive për zhvillim profesional”, thuhet nga OMK.
Ndërkaq, sipas Tevide Imerit, kryetare e Federatës së Sindikatave të Shëndetësisë së Kosovës, është dashur të krijohen politika të tjera shëndetësore, për ta ndalur këtë trend të largimit të mjekëve.
“Ka diskriminim, jo trajtim të barabartë ka diskimin brenda vendeve të punës shumë, kemi problem me sistemin menaxheria që mendoj se është një sistem i kapur përherë nga politika e që nuk ka të bëjë me konkurrencën e vlerave asnjëherë, por përzgjedhjet e menaxhereve kur bëhen, bëhen në mënyrë partiake dhe kjo po ndikon shumë te punëtorët. Këto e dekurajojnë punëtorin me qenë shumë i frytshëm dhe produktiv në vendin e punës kur e din kush po e udhëheqë”
E nga ministria e Shëndetësisë thonë se janë të përkushtuar që kushtet e punëtorëve shëndetësorë të përmirësohen.
“MSh, në vazhdimësi, është e angazhuar që të rrisë kualitetin e shërbimeve shëndetësore, sigurinë e shërbimeve shëndetësore, si dhe krijimin e kushteve për punë. Nuk mendojmë se funksionimi normal rrezikohet, sepse për çdo konkurs që hapet për punësimin e infermierëve, ka dhjetëra herë më shumë kandidat që aplikojnë krahasuar me numrin e vendeve të lira për punësim”.
Ndryshe nga viti 2025, në vitin që lamë pas 111 mjekë anëtarë të Odës kanë tërhequr certifikatën mbi të kaluarën etike.
