Sipas tij, ky vendim i Kurtit është shkurtpamës dhe mund të ketë pasoja për vendin.
Ai përmes një postimi në Facebook ka thënë se kryeministri nuk mund ti kërkojë ndihmë vendeve mike të Kosovës, derisa nuk i përfill kërkesat e tyre.
“Vendimi i fundit i Kryeministrit për targat, i paharmonizuar dhe i pakonsultuar me aleatët perëndimorë, posaçërisht me SHBA, është një vendim shkurtpamës e që mund të jetë edhe me pasoja për vendin. Është e papranueshme kur ne u kërkojmë demokracive më të fuqishme të Botës të na ndihmojnë t’i japim fund mosmarrëveshjeve shekullore me Serbinë, dhe pikërisht kur ato janë në kulmin e angazhimit, kryeministri ynë vepron krye në veti e pa koordinim me partnerët strategjik. Nuk mund t’u kërkosh vendeve mike ndihmë e të mos i përfillësh këshillat e tyre, aq më tepër kur ato, jo vetëm se të kanë marrë nën mbrojtje, por falë edhe angazhimit të tyre, Kosova sot është e lirë dhe e pavarur. Kjo është në kundërshtim edhe me traditën shqiptare”, ka shkruar ai.
Sipas Haradinajt, kryeministri Kurti do të duhej ti analizojë mirë veprimet e tij të cilat ai tha se duhet të jenë në harmoni me SHBA-në dhe BE-në.
Teksa ka shpresuar që zhgënjimi i partnerëve me vendimin e Kurtit sipas tij, të mos ketë pasoja në marrëdhëniet mes Kosovës dhe vendeve mike.
“Kryeministri duhet t’i analizojë mirë hapat e tij dhe në këtë fazë jetike për vendin duhet të jetë në harmoni të plotë me Amerikën dhe BE-në. Andaj, i kërkoj ta rishikojë edhe vendimin për targat. Dua të besoj se zhgënjimi i shprehur i partnerëve tanë me këtë vendim të kryeministrit, nuk do të ketë pasoja për marrëdhëniet e shkëlqyera që ka Kosova me ta”, shkroi tutje ai./teve1.info./