Nikaj tha se kryeministri, Albin Kurti ka dështuar që të koordinohet me partnerët ndërkombëtar, pasi sipas tij, SHBA-ja për herë të parë në mënyrë brutale shpreh zhgënjimin e vet me veprimet e Qeverisë.
“Qeveria nuk është dashur që ta sillte situatën deri në këtë pikë. Është për të ardhur keq që kryeministri ka dështuar që të dëgjoj dhe koordinohet me partnerët tanë, duke shtyrë situatën deri në buzë të një tensioni të panevojshëm . Ne sot në Kosovë kemi një kryeministër i cili nuk është as mish dhe as peshk. Për këtë arsye kemi ardhur në këtë situatë që SHBA0ja për herë të parë në mënyrë kaq brutale e shprehin zhgënjimin e vet me veprimet e Qeverisë”, ka deklaruar ai në një konferencë për media, raporton teve1.info.
Sipas tij, Partia Demokratike e Kosovës nuk do ta menaxhonte një situatë të tillë kështu si Kurti.
“PDK-ja në një situatë të tillë nuk do ta menaxhonte kështu siç e ka menaxhuar Kurti dhe do të siguronte që vendimi të zbatohet dhe në anën tjetër të mos humbim bashkëpunimin me miqtë tanë”, theksoi ai.
Po ashtu, Nikaj thotë se Kurti po e mban të fshehtë propozimin e ri franko-gjerman.
“Çështja kryesore është propozimi i ri gjermano-francez të cilin kryeministri Kurti po e mban të fshehtë. Qytetarit të Kosovës nuk i është shpjeguar se çfarë përmban propozimi franko-gjerman”, përfundoi ai. /Teve1.info/
