Kryetari i Kuvendit, Glauk Konjufca ka thënë se kjo pikë mbetet pjesë e seancës së ardhshme, raporton Teve1.info
Ndërsa, këtë projektligj e kundërshtuan opozita, PDK-ja dhe LDK-ja.
Deputeti i PDK-së, Mërgim Lushtaku në seancën e Kuvendit tha se ky projektligj është i domosdoshëm, por i vonuar.
“Projektligji për mbështetje e punëve publike është i domosdoshëm por i vonuar, është dashur të vij më herët për t’u miratuar në Kuvend”, theksoi ai.
Sipas tij, për mënyrën se si është hartuar ky projektligj hap mundësinë për keqpërdorimet e buxhetit dhe nuk zgjedh problemet me të cilat po përballen bizneset.
Po ashtu, edhe deputeti i LDK-së, Avdullah Hoti këtë projektligj e quajti të rëndësishëm, por sipas tij mënyra dhe qasja e Qeverisë është e gabuar.
“Edhe ligji që e shqyrtuam paradite dhe ky në sens, çështjet që i prek janë të rëndësishme por mënyra dhe qasja e qeverisë është e gabuar. Bile në projektligjin e paradites është edhe kundër Kushtetutës, tash është fakt që kemi problem me investimet kapitale të cila janë realizim në nivelin më të ultë historik në 10-15 vitet e fundit kryesisht për shkak të rritjes së çmimeve, por viti po përmbyllet dhe ky ligj tash është fundi i tetorit që po vjen në Kuvend, plus që nuk është bërë edhe rishikimi i buxhetit”, ka thënë Hoti.
Ai shton se ky ligj është gabim “fund e kry” dhe për ta nuk kalon.
“Ligji është gabim fund e kry, për ne nuk do të shkojë dhe do e shihni vërejtjet e tona sepse ky ligj ka me kriju kaos në menaxhimin e kontratave publike”, deklaroi Hoti.
Projektligji për punë publike, sipas ministrit të Financave, Hekuran Murati mundëson kompensimin e kompanive ndërtimore për materialet të cilat kanë pësuar rritje të çmimit si pasojë e inflacionit. /Teve1.info/