Në një përgjigje për Teve1.info, zëvendëszëdhënësi i Prokurorisë Metropolitane të Budapestit, Rab Ferenc Levente , ka thënë se i dyshuari me inicialet S. S është 48-vjeçar.
“Urdhër-arresti ndërkombëtar është lëshuar nga Përfaqësuesi Special i Sekretarit të Përgjithshëm të OKB-së për Kosovën nën dyshimin për krime lufte. Prokuroria Metropolitane propozoi para Gjykatës Metropolitane arrestimin e përkohshëm me ekstradim të 48-vjeçarit serb. Të dhënat e mëtejshme të burrit nuk mund të publikohen për shkak të rregullave të mbrojtjes së të dhënave”, tha ai.
Po ashtu, ai potencoi se Gjykata hungareze ka kërkuar nga Kosova që të dërgojnë një kërkesë për ekstradim dhe sipas tij, dokumentet duhet të mbërrijnë brenda datës 26 nëntor të këtij viti.
“Në përputhje me rregullat e së drejtës ndërkombëtare, autoritetet hungareze mund të hetojnë vetëm nëse, sipas të dhënave dhe informacioneve ekzistuese, janë plotësuar kushtet për ekstradim. Gjykata hungareze kërkoi nga autoritetet e Kosovës që të dërgojnë një kërkesë për ekstradim dhe të japin informacione të mëtejshme. Dokumentet e kërkuara duhet të mbërrijnë brenda datës 26 nëntor 2022, pasi skadon afati i paraburgimit për ekstradim”, ka deklaruar Ferenc Levente për Teve1.info
Me tej, zyrtari për informim shtoi se pasi të mbërrin kërkesa për ekstradim, vendimi i gjykatës për arrestin e ekstradimit merr formë të prerë.
“Pasi kërkesa për ekstradim të arrijë brenda afatit, nëse plotësohen kushtet dhe vendimi i gjykatës për arrestin e ekstradimit merr formë të prerë, Ministria hungareze e Drejtësisë do të ketë të drejtë të vendosë për ekstradimin”, përfundoi ai.
Në lidhje me këtë çështje, dje Prokuroria Speciale e Kosovës ka njoftuar se në Budapest të Hungarisë, sipas urdhërarrestit ndërkombëtar të kërkuar nga kjo prokurori, është ndaluar serbi S.S., nën dyshimin për krime lufte në maj të vitit 1999 në Pejë, ku ishin vrarë 33 persona.
Sipas Prokurorisë, ndaj të dyshuarit është nxjerrë aktvendim për fillimin e hetimit. /Teve1.info/
