Paraqitja e Gërvallës në Këshillin e Sigurimit është vlerësuar pozitivisht nga njohësit e marrëdhënieve ndërkombëtare.
Sipas analistit Visar Xanit, fjalimi i Gërvallës ka qenë i përqendruar në pikat kyçe në interes të Kosovës.
Ai theksoi se pavarësisht tensionimit që u pa në mes të ministres Gërvalla dhe ambasadorit rus gjatë fjalimeve të tyre, Kosova sipas tij, duhet të vazhdojë me gjuhën e njëjtë.
“Është një vazhdimësi e raporteve për Kosovën. Duket pothuajse një përsëritje e këtyre takimeve e seancave,sepse nuk ka ndonjë risi në këto takime. Si fjalime, si qëndrime duket që e kemi bërë një eksperiencë të mirë, ka një tingëllim të mirë sa i përket gjuhës dhe përmbajtjes që paraqitet aty. Fjalimi i Gërvallës duket një fjalim i mirë i cili përqendrohet në pikat që janë në interes të Kosovës por edhe anëtarët e tjerë gjatë diskutimit e kanë një qasje, do të thotë dihet kush është pro dhe kundër Kosovës. Aty i kemi SHBA-në, si mbështetës i madh dhe Rusinë që në vazhdimësi provon t’i nënçmojë përfaqësuesit e Kosovës. Dhe ka një lloj tensionimi u pa pak a shumë edhe diskutimi i ambasadorit rus,dhe i bie që Kosova duhet të vazhdojë me gjuhën e njëjtë”, ka thënë Xani në emisionin “Info Nata” në tëvë1.
Gërvalla në mbledhjen e Këshillit të Sigurimit tha se Serbia është bërë kërcënimi i dytë (pas Rusisë) për Evropën. Kjo deklaratë sipas analistit, Tomorr Avdia është realiste.
“Në kontekstin ku është zhvilluar seanca e Këshillit të Sigurimit është një gjuhë e pranueshme, sepse deklarata e ministres Gërvalla sa i përket shtetit të Serbisë është një gjë realiste, për arsye se dihet se Serbia përveç se është një aktor shumë i rrezikshëm në Ballkan për sigurinë por edhe është aleat i cili vazhdon të jetë aleat fanatik i Rusisë në shumë aspekte të bashkëpunimit ndërkombëtar, por edhe në aspektin e sigurisë. Serbia përmes faktorit pra Rusisë aty brenda e mban Ballkanin në tension dhe në krizë”, tha Avdia në emisionin “Info Nata”.
Kryediplomatja kosovare, gjithashtu në KS të OKB-ë ka thënë se Serbia bashkë me Millosheviqin e Vuçiqin kanë dashur të na zhdukin Kosovën nga harta, por se ajo është mbrojtur nga UÇK-ja me ndihmën e NATO-s. /teve1.info./