Sipas Imerit, Vetëvendosje në kontrollin e Qeverisë është jashtë çdo pritshmërie, pasi siç tha ai, kjo dëshmohet nga angazhimet dhe qëndrimet e tyre në projektligje.
“Vërehet se Kuvendi i Kosovës ka dalë jashtë funksionit. Kjo është e shkruar në Raportin (e BE-së për Kosovën), pra është gjetje. Me gjasë fokusi kryesor i partisë në pushtet është në Qeveri. Pra, ata deputetë të cilët kanë qenë me peshë politike, në fakt janë në ekzekutiv të natyrshëm që Lëvizja Vetëvendosje në kontrollin e Qeverisë është jashtë çdo pritshmërie. Kjo vërehet nga angazhimet e tyre nëpër forume dhe në qëndrimet që kanë për projektligje. Kuvendi ka humbur rolin e tij, përveç funksioni zgjedhës, pra që kanë zgjedhur kryeministrin Kurti, funksionet tjera nuk i ka pasur”, tha Imeri në emisionin “Këndi i Debatit”.
Më tej, Imeri në Tëvë1 tha se ekziston një komoditet i heshtur nga partitë e opozitës.
“Partitë e opozitës e dinë që nuk do ketë zgjedhje, gjithashtu nuk janë të gatshme, por ndoshta edhe nuk kanë interes”, shtoi ai tutje./Tëvë1.info/