Në fjalimin e saj gjatë senacës parlamentare Hoxha tha se si PDK, konsiderojnë se nuk është e përshtatshme të propozohet vetëm rishikimi i kodit penal sepse sipas tyre, rishikimi i sanksioneve penale nuk e garanton zvogëlimin e numrit të rasteve të ngacmimeve dhe dhunimeve seksuale.
“Prandaj jam këtu në emër të Grupit Parlamentar të PDK-së, që të propozojmë hartimin dhe miratimin e një projektligji i cili do të mundësonte evidentimin dhe regjistrimin e të dhënave të autorëve të krimeve seksuale, në të cilat do të të kishte qasje shteti dhe shoqëria”, tha ajo.
Sipas saj, miratimi i këtij ligji do të mundësonte krijimin e një mekanizmi ku do të regjistroheshin të dhënat e personave të dënuar me vendime gjyqësore.
“Miratimi i një ligji të tillë do të mundësonte krijimin e një mekanizmi në të cilin do të evidentohen dhe regjistrohen të dhënat e personave të dënuar me vendime gjyqësore të formës së prerë për vepra penale si dhunimi, sulmi seksual e ngacmimi, dhe kjo do të kishte efekt të jashtëzakonshëm në luftimin dhe parandalimin e këtyre krimeve”, tha tutje Hoxha./teve1.info./
