Sa i përket masave të votuara sot në mbledhjen e Qeverisë, Bala theksoi se për të njëjtat kanë kryer analiza të shumta.
“Ne kemi marrë edhe praktikat e vendeve në regjion dhe i kemi analizuar të gjitha këto praktika. Po ashtu të gjitha këto masa janë analizuar edhe përmes Konventave të ndryshme të cilat adresojnë çështjen e të drejtave të njeriut. Dhe po ashtu kemi analizuar edhe vetë konventën e Stambollit, prandaj masat aktuale janë të pamjaftueshme dhe kanë qenë të pamjaftueshme sa i përket kryesve të dhunës në familje”, tha ajo në “Info Nata” në Tëvë 1.
Bala shtoi se besojnë se këto masa do ta ulin trendin e raportimit të dhunës në familje.
Qeveria e Kosovës ka miratuar sot ndryshimin e Ligjit për Kodin Penal të Kosovës, duke propozuar për ashpërsimin e dënimeve ndaj kryersve të veprave penale të dhunimit, sulmit seksual dhe dhunës në familje.
Ndër masat që u votuan sot janë edhe ndalimi i së të drejtës për punësim në sektorin publik për personat që shpallen fajtor për veprat penale të dhunimit dhe dhunës në familje, si dhe ndalimin e të drejtës në përfitimin e automjetit dhe drejtimin e automjetit nga 1 deri në 5 vjet. /Teve1.info/
