Dyert e shtëpisë i lënë gjithmonë të hapura.
E në to, gjatë vitit hyjnë qindra mysafirë.
Por, mysafiri më i veçantë në kullën e Met Shalës në Junik, erdhi me 24 qershor të vitit 1998.
Ishte vet i dërguari special i presidentit amerikan Bill Clinton, Richard Holbrook, që do të takohej me dy përfaqësues të Ushtrisë Çlirimtare të Kosovës.
Kështu, ky moment, shënoi edhe një njohje të heshtur të UÇK-së, nga ana e SHBA-ve.
Pikërisht në këtë vend, në vitin 1998, diplomati tashmë i ndjerë amerikan, Richard Holbrook, u ulë pranë një luftëtari shqiptarë, atë kohë i një ushtrie guerile, të panjohur ndërkombëtarisht.
E për ta sjellë deri tek kulla, u angazhua ish-ushtari i UCK-së dhe pronari i shtëpisë, Myrt Shala.
Ky thotë se në shenjë respekti, Holbrook para hyrjes në shtëpi i zbathi këpucët.
“Unë kom ditë pak gjermanisht, kom thanë SHOES kom bo hajgare, edhe ai i ka ni e i ka hek cizmet… – E mbaj mend kur i kanë thanë plakut tem, që kam më ulë në zakonet tuaja, në njërën anë u ulë Gani Shehu, Lum Haxhiu,etj..”, tha Shala.
Myrt Shala, e mban në mend një veprim interesant që e bëri diplomati amerikan në odën e tij.
“Me kujtohet shumë me rendesi kur i ka shkru dy letra. Njërën ja ka jep Christopher Dellit, ndërsa tjetrën Fehmi Aganit. E Fehmi Agani e ka mshef letrën, e ka shti në çorape…”, tha ai.
Ndërsa pas takimit, Holbrook theksoi se u zemerua atë ditë, nga veprimet e forcave serbe.
“Ky është rezultati i luftimeve, ishin vetëm forcat jugosllave të cilat hynin dhe i dëbonin njerëzit nga shtëpitë e tyre e më pas i shkatërronin ato. Ky nuk është luftim, ishin veprime që më herët i pamë në Bosnje”, ka thënë Holbrook.
Por, vizita e këtij niveli, nuk i pëlqeu forcave serbe.
Vetëm disa minuta pasi Holbrook u largua, ata hodhën gjithë artilerinë e tyre mbi kullën e Shalajve.
“Momentin që u dal Holbrooku, këtu mas 10 minutave u kanë një lufte tmerrshme, edhe helm na kanë gjujtë..”, tha Shala, pronari i shtëpisë ku u mbajt takimi.
Pasi që u djeg e tëra, shtëpia ku u zhvillua takimi më i rëndësishëm i luftës së Kosovës, u la në harresë nga institucionet e vendit.
Ndërsa në gjendje siç ka qenë, u kthye vetëm pas shpenzimeve të familjes Shala.
Kronika e realizuar nga gazetari, Fidan Zejnullahu
