Në një intervistë për revistën zvicerane “Die Republik”, Kurti ka thënë se ka katër arsye të cilat e bëjnë një konflikt mes dyja vendeve të imagjinueshëm, përcjell teve1.info
Sipas tij, derisa Kosova është demokraci, Serbia nuk është.
“Ne nuk kemi frikë, por duhet të jemi të vëmendshëm. Mbesim të shqetësuar. Sipas mendimit tim ka katër arsye, që e bëjnë një konflikt të imagjinueshëm. Së pari, Serbia nuk e njeh ende pavarësinë e Kosovës. Lufton kundër njohjes sonë ndërkombëtare, dhe në të njëjtën kohë financon strukturat kriminale brenda Kosovës për ta minuar sundimin e ligjit dhe sovranitetin tonë. Së dyti: Në Serbi nuk mund të pajtohen me krimet e luftës të kryera në vitet 1990-ta. Është për keqardhje. E treta, e që më shqetëson: Kosova është një demokraci, Serbia nuk është. Kushdo që kufizohet me një autokraci është në rrezik. Së katërti, Beogradi zyrtar mban lidhje të ngushta me presidentin despot rus Vladimir Putin. Vuçiqi e ka takuar Putinin 20 herë në 10 vjet, së fundi më 25 nëntor të vitit 2021 në Sochi, tre muaj para se të fillonte lufta në Ukrainë”, ka thënë Kurti.
Tutje, Kurti është pyetur edhe për nofkën e re që presidenti serb, Aleksandar Vuçiq ia ka lënë, duke e quajtur “Zelensky i vogël”.
“Vuçiqin e kam cilësuar më herët në Facebook si ‘Putin i vogël’. Unë mendoj, se ai nuk kishte kreativitet të mjaftueshëm, duhej të dilte me diçka më kreative”, ka theksuar kryeministri Kurti.
I pyetur nëse ka shtrënguar dorën me Vuçiqin, ai ka thënë se nuk e ka bërë këtë.
“Jo kurrë. Kjo për shkak se jemi takuar tre nga katër herët gjatë pandemisë COVID dhe nuk ka një marrëveshje përfundimtare ende”, shtoi kreu i Qeverisë së Kosovës. /Teve1.info/
