Kurti në një konferencë për media ka thënë se do të subvencionojnë të gjithë ata që kursejnë energjinë elektrike, raporton Teve1.info.
Sipas tij, do të subvencionohet dyfish fatura, për muajt në të cilët qytetarët do të shpenzojnë më pak se në muajt e njëjtë të vitit të kaluar.
“Sot po prezantojmë një pako që ka për qëllim mbështetjen e qytetarëve për tu përballur me krizën inflacionare. Nisur nga gjendja e rënduar me energjinë, sot më shumë se kurrë është e domosdoshme të kursejmë, andaj do të subvencionojmë të gjithë ata që kursejnë energjinë elektrike. Për aq sa kursehet në raport me të njëjtin muaj të vitit paraprak, ne do të subvencionojmë dyfish faturën. Do të procedojmë në Qeveri e pastaj në Kuvend, projektligjin për punë publike, e cila parasheh kompensimin për inflacion për materiale ndërtimore dhe punët përcjellëse për kontratat ekzistuese të punës”, ka deklaruar ai.
Po ashtu, Kurti tha se nga shtatori do të ndahen nga 50 euro për zyrtarët publikë, ndërsa do të ketë pagesë të njëhershme prej 100 euro për punëtorët e ndërmarrjeve publike.
“Për pensionistët do të ndajmë shumën e njëhershme prej 100 euro, kurse familjet me asistencë sociale do t’i mbështesim duke dyfishuar shumën e asistencës për një muaj. Punësimin e punëtorët i kemi prioritet dhe do të vazhdojmë t’i përkrahim kësisoj. Për zyrtarët publik do të ndajmë shtesën prej 50 euro duke filluar nga muaji shtator, kurse për punëtorët ndërmarrjet publike do të ndajmë shumën prej 100 euro”, tha më tej ai.
Më tej, shefi i ekzekutivit të Qeverisë u zotua se do të mbështesin bizneset që rrisin pagat e punëtorëve, teksa theksoi se për studentet pritet që të ndahen edhe nga 100 euro.
“Do të mbështesim secilin biznes që i rrit pagat e punëtoreve duke subvencionuar 50% të rritjes së pagës për punëtorë maksimumi 100 euro për tre muajt e parë. Përkrahjen tonë do ta zgjerojmë edhe për studentet për të cilët do të ndajmë shumën prej 100 euro në muajin nëntor”, deklaroi Kurti. /teve1.info/