Ministrja Nagavci gjatë një konference për medie tha se humbja e mësimit është e papranueshme krahas rezultateve të dobëta të arsimit bazuar në testet ndërkombëtare për matjen e cilësisë.
“SBASHK ishte pajtuar me ish qeverinë PAN me një koeficient më të ulët, ne jemi siguruar që të ofrojmë kushte të barabarta për mësimdhënësit dhe me Projektligjin e ri mësimdhënësit nuk do të ndahen ata klasorë nga mësimdhënësit lëndore, do të trajtohen barabartë dhe përqindja e rritjes së koeficientit për ta do të jetë rreth 8 për qind nga sa ka qenë me projektligjin e kaluar”, ka thënë Nagavci.
“Kemi ndjekur deklarimet e ditëve të fundit që Sindikata e Arsimit ka paralajmëruar grevën më 25 gusht, duke e pranuar se e njohim organizimin sindikal, kërkesat për kushte më të mira të punës, vetë këto që i përmenda janë disa nga veprimet që i kemi ndërmarrë që të lehtësohet puna e mësimdhënësve. Mosmbajtja e mësimit i dëmton më së shumti nxënësit dhe shkel të drejtën e tyre për arsim. Humbja e mësimit është cenim i së drejtës themelore e fëmijëve për arsim dhe për ne është e papranueshme sepse në vazhdimësi po punojmë që të ofrojmë mbështetje për mësimdhënësit dhe përmirësimin e rezultateve në arsim”, tha ajo.
Nagavci bëri të ditur se janë bërë edhe përgatitjet tjera të nevojshme për fillimin vitit të ri shkollor, siq janë tekstet e reja shkollore të cilat tha se po shpërndahen nëpër komuna si dhe infrastruktura teknike e ligjore.