Për herë të parë që nga viti 2013, të enjten një përfaqësues i lartë i Shteteve të Bashkuara të Amerikës, u përfshi direkt në takimet dialoguese në Bruksel mes Kosovës dhe Serbisë.
Gabriel Escobar, ishte prezent në zyrat e Bashkimit Evropian, derisa me orë të tëra po zhvillohej takimi mes kryeministrit kosovar, Albin Kurti dhe presidentit serb, Aleksandër Vuçiq.
Aty, përfaqësuesi amerikan, para dhe pas takimit publikisht shprehu qëndrimin që SHBA kërkon marrëveshje që nuk cenon Kushtetutën dhe sovranitetit të Republikës së Kosovës.
Për këtë çështje, është angazhuar ekskluzivisht sekretari i Departamentit Amerikan të Shtetit, Anthony Blinken.
Kjo u bë e ditur në një përgjigje zyrtare nga zyra e presidentit amerikan.
“Ka zyrtarë të lartë që edhe këtu në Uashington po e bëjnë të njëjtën. Kjo është një çështje me të cilën vetë sekretari Blinken është angazhuar personalisht prej një kohe të gjatë. Ky është një prioritet që përfshinë gjithë organizatën tonë, në terren dhe këtu në SHBA”.
Fakti që nuk pati marrëveshje mes dy palëve dhe afrimi i datës 1 shtator kur është paralajmëruar nga qeveria e Kosovës, vendosja e masave reciproke për lëvizje të lirë, për njohës të politike nuk po duket shumë shqetësuese.
Gazmir Raci thotë se tashmë i gjithë presioni amerikan dhe evropian është kthyer karshi Serbisë.
Involvimi direkt i Shteteve të Bashkuara të Amerikës, edhe për Visar Ymerin, është një sinjal pozitiv.
E për deputetin e Lëvizjes Vetëvendosje, Alban Bajrami, e gjithë kjo është meritë e kryeministrit Albin Kurti.
Pas takimit, shefi i diplomacisë së BE-së, Josep Borell, tha se do të ketë takime të tjera, me qëllim të arritjes së një marrëveshjeje që do të ulte tensionet para 1 shtatorit, kur pritet fillimi i masave të reciprocitetit ndaj Serbisë nga ana e Kosovës.
Raporti i gazetarit Arton Rama.