KFOR-i amerikan po e monitoron situatën në veri të Kosovës.
E ky aktivizim i KFOR-it, u bë kur kanë mbetur edhe dy javë, nga hyrja në fuqi e zbatimit të vendimit të Qeverisë së Kosovës për targa dhe dokumentet hyrje-dalje.
Ndërkohë pak metra me tutje, në pikën kufitare të Jarinjës, qytetarët po lëvizin lirshëm nga Kosova për në Serbi.
Prezenca e shtuar e KFOR-it në rrugë, e ka shtuar sigurinë tek mërgimtarët kosovarë.
Por, ndryshe krejt këtë e kanë parë qytetarët serb.
“Jetoj në Serbi, nuk kam ndonjë pikë takimi, ndodhem këtu vetëm për rrugëtim por ka një përqendrim të madh të KFOR-it, i kam edhe xhirimet, kishte flamuj austriake, e këtu kishte amerikanë në kënd dhe kështu”, tha një qytetar serb.
Ndërkohë, rreshteri amerikan për Tëvë1, Clyton Bunch, ka thënë se të mërkurën gjendja në Jarinje ishte e qetë.
“Unë dhe ekipi im arritëm këtu dy orë më parë. Ne secili kemi një epror, ndërsa eprori im më caktoi të vija këtu. Njerëzit po lëvizin nga jugu në veri dhe anasjelltas. Ne nuk po kërkojmë diçka të veçantë, na është thënë vetëm të vrojtojmë këtu, njerëzit po ndalen dhe po komunikojnë me neve për aq sa dinë të flasin anglisht, na përshëndesin dhe të gjithë janë shumë miqësor”, tha ai.
Bunch ka shtuar se detyrë e KFOR-it, është sigurimi i lëvizjes së lirë për të gjithë.
“Detyra jonë është ta sigurojmë lëvizjen e lirë të njerëzve, për detaje më shumë, duhet të pyesni në zyrën për media, por vetëm dua të them që nuk ka rëndësi a jeni nga jugu apo veriu, të gjithë janë miqësor me ne dhe mikpritës, po kalojmë kohë të mirë këtu”, shtoi ai.
Sipas vendimit të fundit të Qeverisë së Kosovës, nga një shtatori do të hyjë në fuqi vendimi për targa dhe dokumentet hyrje-dalje për qytetarët serb që hyjnë nga Serbia.
Raporti i gazetarit Fidan Zejnullahu.
