Kurti tha se Kosovës i nevojitet mbështetja e Bashkimit Evropian dhe NATO-s për ta vazhduar luftën kundër krimit të organizuar.
“Kemi shtetin demokratik të Kosovës, policinë profesionale dhe në palën tjetër kemi struktura të paligjshme të Serbisë që janë kthyer në banda kriminale që kanë ngritur edhe barrikada. Mund të thuhet se janë dy palë… Nuk mund të shmangim politikat e vendosura, duhet të ketë zero tolerancë ndaj krimit dhe korrupsionit. Na duhet mbështetja nga BE-ja, NATO, perëndimi demokratik për një vend demokratik si Kosova”, është shprehur Kurti.
Ndërsa, i pyetur nëse është e mundur tërheqja nga vendimi për zbatimin e reciprocitetit për targat, Kurti tha se Kosova po kryen obligimin ligjor.
“Më 29 qershor kemi marrë vendim për t’i mundësuar qytetarëve serbë tabela të regjistruara që janë trashëgimi e Millosheviqit të prodhuara në Serbi, me akronime të qyteteve në Kosovë, që t’i konvertojnë në tabela legjitime. Në këtë drejtim kemi filluar fushatë për të informuar qytetarët serbë dhe kemi krijuar një stimul financiar që gjatë konvertimit qytetarët serbë nuk do duhet të paguajnë TVSH apo doganën që mund të shkojë deri në 5 mijë euro. Vetë Serbia është pajtuar që që prej janarit 2018 nuk do prodhojnë tabela të tilla në Serbi dhe nuk do t’i detyrojnë serbët t’i përdorin. Katër vite më vonë po implementojmë diçka që është në pajtim me Kushtetutën dhe ligjet tona. Duke qenë në përputhje me zotimet e Serbisë dhe obligimet e tyre gjatë negociatave në Bruksel, pra nuk ka mënyrë tjetër dhe është në dobi të të gjithëve të bëjmë çdo gjë legjitime”, ka deklaruar Kurti.
