Gjeneratorët po u shërbejnë bizneseve për të funksionuar në mungesë të rrymës. Kjo pasi që qytetarët po përballen me reduktime paradite të energjisë elektrike prej 2 orësh që nga e hëna.
Ani pse Ministria e Ekonomisë të hënën njoftoi se është rikthyer furnizimi i rregullt me energji elektrike, kjo pas një marrëveshjeje mes Kosovës dhe Shqipërisë reduktimet vazhduan edhe të martën.
E nga KEDS thanë se reduktimi i energjisë elektrike gjatë ditës së sotme u bë pas udhëzimeve të marra nga KOSTT-i.
“Edhe gjatë ditës së sotme ka pas kufizim të energjisë elektrike për rreth 1 orë e gjysmë dhe normalisht kjo ka ndodh pas udhzimeve që kemi marrë nga KOSTT-i sepse ne veq e kemi obligim të I kryjmë obligimet e tyre. Ndërkaq pas asaj periudhe deri në ora 14:00 nuk kemi pranuar ndonjë udhëzim nga KOSTT-i për kufizim të energjisë elektrike”, tha Margarita Rashiti – zyrtare për informim në KEDS.
Këto reduktime po ia vështirësojnë jetën qytetarëve.
“Shumë se kemi punë dhe punojmë online dhe fëmijët online punojnë në disa organizata pastaj kur ka reduktime është vështirëtë punohet, mandej të mos flasim për gatim dhe nevoja tjera të jetës. Edhe në fshat jetoj tashmë e një kohë të gjatë dhe ka reduktime katastrofale”, tha qytetari, Idriz Mehmeti.
“ Besoj shumë na dëmtojnë dhe na pengon shumë”, tha qytetari, Burhan Shaqiri.
“ Nëse nuk ke rrymë nuk punon as TV as shporeti dhe po ka shpesh reduktime”, tha Nexhat Sejdiaj.
Kompania Kosovare për Distribuim me Energji Elektrike (KEDS) nga mëngjesi iu dërgoi mesazhe konsumatorëve në aplikacionin mobil rreth orarit të ndërprerjes së rrymës, që kryesisht shihet të zgjasin vetëm dy orë.
Raporti i gazetares Lendrina Kodrolli.
