Kryetari i Partisë Demokratike, Memli Krasniq, ai i Aleancës për Ardhmërinë e Kosovë, Ramush Haradniaj, i thanë po ftesës së të parit të Shqipërisë.
Por në objektin e Kuvendit të Kosovës për t’u takuar me Begajn nuk erdhi kryetari i LDK-së, Lumir Abdixhiku.
Kjo më arsyetimin se takimi mund të mbahet vetëm brenda ambienteve të selisë së partisë.
“Lidhja Demokratike e Kosovës shpreh keqardhje për mosrealizimin e takimit zyrtar me Presidentin e ri të Shqipërisë, shkëlqesinë e tij Bajram Begaj; me rastin e vizitës së tij të parë në Kosovë. Për dallim nga krerët institucional paraprak të Shqipërisë, Presidentët e shkuar, Kryeministrin e tanishëm, e të tjerë kryeministra paraprak, Presidenti Begaj ka refuzuar të takojë LDK-në në selinë qendrore të saj. LDK ka selinë e vet dhe ajo mbetet e hapur për çdo zyrtar të shtetit shqiptar – siç ka qenë përherë”, tha zëdhënësja LDK-së, Sibel Halimi.
Mos shkuarjen në Kuvendin e Kosovës e ka quajtur skandal anëtari i LDK-së, Skender Hyseni.
“Pretendimi idhnak i Abdixhikut se Presidenti shqiptar duhej të shkonte në selinë e LDK-së për takim, shpërfaq një ego infantile politike të të parit të LDK-së. Pa dashur të futem në detajet e protokollit, me duhet të konstatoj se Abdixhiku me krekosjen e tij, paska shkaktuar një skandal politik e diplomatik tërësisht të panevojshëm në komunikimet aq të rëndësishme ndërshqiptare. Kuvendi i Republikës së Kosovës është seli, e përtej selie e çdo partie politike parlamentare në Kosovë”, tha ai.
Raporti i gazetares Doresa Geci.