Sipas komunikatës së KEDS-it, në bazë të planit konsumatorët gjatë ditës së hënë do të kenë nga gjashtë orë energji elektrike dhe dy orë kufizime.
Këto kufizime, thotë KEDS-i, do të ndodhin për shkak se KEDS dhe KESCO nuk kanë mundësi financiare që më të nominojnë energji jashtë asaj që prodhohet nga gjeneratorët vendorë.
“Prej nesër, vendi do të furnizohet vetëm nga prodhimi vendor. Kjo, pasi KEDS dhe KESCO nuk kanë mundësi financiare më që të nominojmë energji jashtë asaj që prodhohet nga gjeneratorët vendorë. Deri tek kjo situatë ka ardhur për shkak të çmimeve enorme që ekzistojnë në tregjet ndërkombëtare dhe mosmbulimit të kostos së sistemit. Kjo ka sjellë situatë të rëndë financiare edhe për KOSTT-in, të cilën ENTSO nuk e lejon më të bëjë devijime. Kjo bën që secila kërkesë mbi prodhimin vendor të kufizohet në pamundësi të mbulimit nga importi”, thuhet në njoftim.
Tutje, KEDS bën të ditur se energjia elektrike e blerë deri më sot ka shkaktuar humbje enorme si për KEDS-in ashtu edhe për KESCO-n.
Po ashtu, thuhet se dy kompanitë kanë mbyllur vitin me humbje të mëdha, njëra me 27.8 milionë euro e tjetra 18.5 milionë euro.
“Gjatë shqyrtimit të jashtëzakonshëm tarifor, rregullatori kishte marrë parasysh subvencionin e qeverisë prej 100 milionë eurosh. Asnjë cent nga ajo shumë nuk është shpërndarë tek furnizuesi. Kjo, e ka rënduar gjendjen edhe më tepër. Sot, disa muaj pas, të gjitha mundësitë financiare janë shteruar. Dy kompanitë, pra KEDS dhe KESCO nuk mund të bartin më të vetme barrën e krizës botërore energjetike dhe pasojat e saj në Kosovë. Kërkohet me urgjencë edhe veprimi i aktërëve tjerë në mënyrë që së bashku ta përballojmë këtë krizë”, thuhet në njoftim.
