Kryeministri i Kosovës, Albin Kurti, disa herë ka përsëritur se Serbia kishte nisur një fushatë të egër për t’i keqinformuar serbët lokal në veri të vendit në lidhje me vendimet e qeverisë së Kosovës për targa dhe letërnjoftime. Por, analistët thonë se nuk është bërë diçka më shumë nga institucionet vendore as 10 ditë pas heqjes së barrikadave.
Përmes kësaj kampanje u synua që të informohen qytetarët serbë.
Krejt kjo pas vendimeve të Qeverisë së Kosovës, për targa dhe dokumentet hyrje-dalje.
Por, kësaj fushate të institucioneve të Kosovës, iu përgjigj shteti serb me një kundër-fushatë.
Lajmet e rreme nga autoritetet serbe patën ndikim te serbët lokal në Kosovë.
Si rrjedhojë, ata ngritën përsëri barrikada, ndërsa qeveria e Kosovës, shtyu zbatimin e vendimeve për 30 ditë.
Arsyet për këtë, i ka përsëritur edhe një herë kryeministri i Kosovës, Albin Kurti, të mërkurën në mbledhjen e qeverisë.
Por, kur kanë kaluar 10 ditë nga ngjarjet e fundit në veri, a është shtuar intensiteti i fushatës për informimin e qytetarëve serbë?
Njohësi i çështjeve politike, Dritëro Arifi, thotë se ekzekutivi duhet të bashkëpunoj edhe me serbët lokal.
Duhet të kyçen edhe serbët lokal qe janë lojal ndaj qeverisë dhe t’ua shpjegojnë qytetarëve serb që këto vendime nuk janë kundër tyre.
Nga Qeveria e Kosovës, kanë thënë se përgjegjëse e fushatës për informim për vendimet e qeverisë është Ministria e Punëve të Brendshme.
Për këtë, Tëvë1 ka pyetur në dikasterin e udhëhequr nga Xhelal Sveçla.
Por, në këtë ministri nuk kanë shprehur gatishmëri për t’iu përgjigjur interesimit të televizionit, gjatë të mërkurës. Raporti i gazetarit Fidan Zejnullahu.
